كلنا سمعنا عن خبر تعليق الدراسة بالمدارس والجامعات لمدة إسبوعين طبعا الخبر ده مترتب عليه حاجات كتيره قوى وتأثيره حيكون ملموس لابعد الحدود مش بس على الطلبة أو الأسر اللى منها طلبه لكن على مصر كلها ولو جينا نتكلم من وجهة نظر تكنولوجيه بحته فمصر كانت بدأت من فتره في دمج التكنولوجيا فى التعليم وكان صدر قرار من التسعينات بإنشاء غرفة لمناهل المعرفة في كل مدرسة .
انا احمد رجب وهكلمكم النهاردة عن وجهة نظرى لاستخدام التعلم عن بعد فى مصر
طبقا للكلام اللى قاله وزير التربية والتعليم في إن :-
1. السنوات من 3 ابتدائى لحد 2 اعدادى حيتم تدريسهم عن طريق القنوات التعليمية وموقع مخصص حتعمله الوزارة وحيتوزع عليهم دليل للمذاكرة من المنزل .
2. امتحانات الشهادات الاعدادية والثانوية فى ميعادها دون تغيير بالتنسيق مع وزارة الصحة .
3. اولى وثانية ثانوي حتمتحن أون لاين لأنهم يمتلكوا لتابلت "ودول أسهل حاجه لان سهل التواصل بينهم وبين الوزارة "
دى ابرز النقاط اللى اتكلم عنها وزير التربية والتعليم ولتفاصيل اكتر ممكن تشوفوا الفيديو ده.
وعشان نفهم اكتر وجهة نظرى لازم نعرف ايه هي إمكانيات الوزارة التكنولوجيا، لحد دلوقتى الوزارة تمتلك موقع بنك المعرفة اللى الحقيقة من كتر غزارته محتاج شرح لكنه موقع رائع ومعاه موقع للوزارة وكمان موقع للتعليم عن بعد اللى بيحتوى على المناهج الدراسية والكتب الدراسية بصيغة رقمية .
اعتقد إن المقومات دى رغم انها قليلة لكنها تقدر تخلينا نعدى الازمة دى لكن للاسف احنا لسه قدامنا مشوار كبير عشان نعرف نكمل ونوصل لتعليم عن بعد فعلى وحقيقى خصوصا وأن الموضوع شكله مطول .
محتاجين نعمل ID كارت لكل طالب معاه خط محمول كشكل مبدئى لأن التابلت حيكون مكلف جدا على الدولة خط المحمول اسهل واحنا عندنا شركة اتصالات قومية ممكن تخدم الموضوع
وزير التربية والتعليم طارق شوقي ينقل عن وزير الاتصالات عمرو طلعت موافقة شركات الاتصالات على الدخول المجاني على المواقع المرتبطة بالعملية التعليمية دون التأثير على باقات الإنترنت، بحسب ما ذكره في اتصال هاتفي لبرنامج الحكاية مع عمرو أديب على ام بي سي مصر
كده عملنا جهة إتصال بين الوزارة وبين الطلبة محتاجين على الأقل فى كل مدرسة وحدة بث رقمى ودى سهل عملها ومتوفرة كمان
المشكلة بقى حتكون فى توفير جهاز لتشغيل الخط اللى مع كل طالب، لو الطالب معهوش تليفون ذكى حيكون ID بتاعه بأكاونت خاص بيه على موقع الوزارة ومنها للمدرسة التابع ليها طيب لو مفيش ده ومفيش إمكانية كمبيوتر اصلا فى المنزل يتم عمل حصر لكل الطلبة دى ويتعملهم جدول داخلى بأوقات الدراسة فى المدرسة وتكون بالتنسيق مع وزارة الصحة لحين توفير تابلت ليهم وقلة عددهم حتكون فى مصلحتنا .
وحدة البث اللى في كل مدرسة حيكون الغرض منها تسجيل وبث مباشر للحصص لكل فصل مع تفاعل من الطلاب وبقى فيه برامج كتيرة بتتيح الموضوع ده وبشكل مجانى بس ندور على برنامج يكون امان ويدعم الفيديو شات وتفاعل الطلبه معاهم حيكون من خلال حسابات رسمية لكل طالب مسجل فى المدرسة دى .
نيجي بقي للمشاكل اللى حنواجهها محتاجين خوادم عملاقة لتسجيل البيانات دى وده اللى شايفه اصعب حاجه فى المعادلة دى ممكن نربط المدارس والإدارات بخوادم المصرية للاتصالات الموجودة فى كل سنترال ونعمل وحدات تخزين للمدارس فيها، بكده حنخفف الحمل وحنكسب سرعة اكتر
مشكلة تانيه بقى وهى نقل كل الداتا "اقصد بيها داتا التلاميذ من أسماء وتفاصيل" سواء ورقية أورقمية وأعتقد إن المدرسين والمجتمع كله ممكن يتعاون بشكل تطوعي فى حاجه زى دى .
بكده احنا حنكون ربطنا بين الطالب والوزارة والمدرسة والمدرسين بأقل الامكانيات
فى النهاية دى وجه نظرى وشايف إن مصر قادرة تعدى المرحلة دى لاننا نملك الامكانيات بس للاسف (متربة) فياريت ننضف غرفة مناهل المعرفة كده ونظبطها، ونبدأ نبث محتوى جيد للطلبة وننتظر حلول مبتكرة من الوزارة واتمنى اننا نعدى المحنة دى بعقلانية.