يمكن مش من عادة مدونتنا اننا نتكلم عن تطبيقات مدفوعه لانى مش من هواية البرامج دى وبميل اكتر للتطبيقات المجانية طبعا لاننا مفلسين او لاننا مستخسرين لكن مؤخرا وده طبعا مش عشان دخلى زاد او بقيت غني لسمح الله بس لانى قولت اجرب واشوف الفرق بين النسخ المجانية والمدفوعه من التطبيقات فحبيت ابدا بمجال التطبيقات الصوتيه زي ديزر وانغامى وسبوتي فاى لانى من عاشقين الاغانى وديما مشغلها باستمرار فحابب انقلكم تجربتى الشخصية وطبعا كل واحد حر فى اختياراته .
خلونا نتكلم الاول قبل ما نبدا هو ليه انا استخدم تطبيق مدفوع مش النسخة المجانية او ليه انا استخدم تطبيق يبث ليا الاغانى وانا ممكن اسمعها من مكان تانى او احملها وفى اكتر من نقطة حشرحها فى الموضوع ده
اولا : مساحة الجهاز لو جهازك مفيهوش مساحة او لو انتا من مستخدمين الايفون وبتواجه صعوبة فى انك تحتفظ بالاغانى على تليفونك
ثانيا: سعات كده بتهف على بالك اغنية كده وعاوز تسمعها دلوقتى وخلاص مش محتاج انها تكون موجوده فى موبيلك فالتطبيقات دى حتساعدك فى كده
ثالثا : بقى وده الاهم جودة الاغنية نفسها كتير مننا كان بيستخدم ولازال بيستخدم تطبيق soundclude وظهرة معاه المشاكل تباعه من عدم جوده المزيكا وكثرة الكافرات اللي بيعملها المستخدمين + عن ختامها بوجود الدعاية زيها زي النسخ المجانيه من باقى التطبيقات
نيجي بقى لنقطة تانيه مهمة قبل مقارنتنا هى وان اغلب الشركات اصحاب التطبيقات دى بقت بتاخد دور شركات التوزيع وبتدور ديما على تعاقدات حصرية سواء من شركات الانتاج او المغنيين نفسهم فلازم تتابع المغنى بتاعك متعاقد مع اى شركة فى دول
نتكلم بقى عن عيوب النسخة المجانية فى التطبيقات واللى انا شايفهم من وجهة نظرى متشابهين كتير
اولا عيب الاعلانات الصوتيه
ثانيا سماع الاغانى بشكل عشوائى
ثالثا تحميل الاغانى او وضع عدم الاتصال
رابعا الحصريات مش حتقدر تستمع للاغانى الحصرية اول نزولها
ندخل بقى على المميزات واللى حنتكلم فيها عن كدل تطبيق لوحده
مميزات «سبوتيفاي بريميوم – Spotify Premium»
1. كود سبوتيفاى من افضل المزايا فممكن بدل ما تدور على صديقك على التطبيق ببساطة بتمسح كود QR الخاص بيه .
2. حسابات رسمية للمغنيين اللى بيخليك واثق من انك حتلاقى الاغانى الرسمية وبجوده عالية.
3. كلمات الاغنية اللى حتقدر تتصفحها وانت بتسمع الاغنية لكن للاسف مش متوافره فى كل الاغانى اللى على المنصة .
4. الميزة المحترمة بقى من وجة نظرى التى لا قيمة لها :) هى ان التطبيق بيديك امكانية انك تشوف فريق العمل الخاص بالاغنية
5. زر عدم الاعجاب اللى بيخليك تتخطى الاغنية اللى مش عجباك ومتجيش تانى
6. الابلاغ عن المحتوى ده طبعا لو فيه اغنية حسيت ان فيها محتوى منافى ولو انى ضد الميزة دى بس تعتبر ميزة بردو
7. سيرة الفنان الزاتيه ومعلومات عنه
8. الاقتراحات لاغاني او مغنيين مماثلين لاستماعك او استماع اصدقائك
9. اخفاء سجل استماعك عن الاصدقاء
10.قوائم التشغيل المشتركة بين الاعضاء فى التطبيق او الاصدقاء
مميزات «ديزر بريميوم – Deezer Premium»
1. التطبيق بيميزلك بين الاغنية او المقطوعة الموسيقية بوجود رمز الميكرفون جنب اسم الاغنية .
2.وضع الموقت اللى ممكن تشغل بيه الاغانى لحد وقت معين النوم مثلا وبعد كده التطبيق بيقف .
3. تكملة الاغنية بعد انتهائك من المكالمات الصوتية موجوده فى كل مشغلات الاغاني لكن المميز فى التطبيق فى انك ممكن تلغيها من الاعدادات .
4. هنا بقى كلمات الاغاني بتمشي مع سير الاغنية زى الكايروكى .
5. من احسن الميزات بقى اللى في البرنامج ده هو وانغامي ميزة التعرف على الموسيقي اللى شغاله لو انت فى عربيه وسمعت تراك عجبك بدوس على الاوبشن والبرنامج بيلقط تفاصيل الاغنية وبتقدر تسمعها.
مميزات «أنغامي بلس – Anghami Plus»
1.زرار عدم الاعجاب بالاغنية .
2. عن باقى التطبيقات امكانية مشاهدة الفديو كليب الخاص بالاغنية .
3.مشاركة كلمات الاغنية مش بس كده لا ده لو فيه جملة من كلمات الاغنية ممكن تشاركها فى اى تطبيق تاني .
4. لو في اى غلطات فى الاغنية او كلماتها فى امكانية انك تبعت تطلب تعديلها.
5. تصنيف الاغانى عن طريق وضع علامة E بجوار الاغانى الخارجة او التى تحتوى على محتوى غير مناسب للاطفال.
6. امكانيات اكتر فى شريط الاشعارات الخاص بالهاتف اللى ممكن تضيف الاغنية للاغانى المفضلة بدون الدخول للتطبيق.
7. الحالات بقى او Stories زي ما فى الواتس او الفيسبوك فهنا بتلاقى حالات عن المغنيين فى ثوانى معدوده لاغانى جديده او الاكثر استماعا .
8. وطبعا السيرة الزاتيه للمغنى ومعلومات مختصرة عنه .
9.هنا ممكن تختار المحتوى اللى تعرضه لو عاوز التطبيق يجيبلك الاغانى العربية فقط او الانجليزية او الاتنين مع بعض .
10. متابعة الاصدقاء والاغانى اللى بيستمعولها .
11. ال QR كود اللى حتقدر توصل لاصدقائك بسهول .
12. امكانية الاشتراك للغير او اهداء الاشتراك او دفع الاشتراك لاحد الاصدقاء
13. التحميل التلقائى للاغانى على اى جهاز اخر بتستخدم عليه نفس التطبيق سواء كان كمبيوتر او موبيل تانى .
14. امكانية استنساخ اغانيك من اى تطبيق تانى ودى عاوزة شرح لانها ميزة عظيمة فركز شوية ... لو انت مشترك فى تطبيق تانى زي ديزر مثلا فانت بكل سهولة ممكن تجيب الاغانى اللى كنت بتسمعها عليه على تطبيق انغامى بنفس الplaylist.
15. الوضع الليلى .
16. اختصارات للاغانى على سطح الهاتف لتشغيل الاغنيه بسهولة.
17. الموقت الزمنى وكمان ميزة المنبه انك تصحى على الاغانى المفضلة عندك .
18. دمج المساعده داخل التطبيق فى التطبيقات التانيه لو ضغط على المساعدة حينقلك لصفحة خارجيه على المتصفح .
19. معرفة الاغنيه عن طريق الصوت .
ملاحظة كمان مهمة لازم نحطها فى الاعتبار زي ما قولنا فى الاول ان التطبيقات دى بدات بتتعاقد مع المغنيين وشركات الانتاج عشان كده لو انت من هاويين اغاني روتانا والخاليجي وبعض المغنيين المصريين على رئسهم انغام فانتا مش حتلاقى اغانيهم فى تطبيق انغامى حتلاقيها فى دييزر كمان لو انت من هواة الاغاني الاجنبية فانصحك بسبوتيفاى لان مكتبته الاجنبيه ضخمة ولو انتا هاوى الاغانى الاندرجراوند والمهرجنات فانغامى مكانك انا عن نفسي رغم حبي لانغام وسبب اشتراكى فى دييزر كان هي ومحمد عبده الا انى رجعت تانى لانغامي لسهولته من وجهة نظرى ولمحتواه العربي الضخم فى النهايه انت قرر واختار